اے کے ڈی ہولڈنگ نے پاکستان سروسز لمیٹڈ کے 27.9 فیصد حصص 6.3 ارب روپے سے زائد میں خرید لیے
کراچی پرل کانٹی نینٹل ہوٹلز کی چین کا انتظام سنبھالنے والی کمپنی میں دو کمپنیوں نے 56 فیصد حصص حاصل کر لیے ہیں جس کے بعد ممکنہ طور پر کمپنی کے قبضے کے حوالے سے قیاس آرائیاں شروع ہو گئی ہیں۔
سیکیورٹیز ایکٹ 2015 کے تحت پاکستان اسٹاک ایکسچینج میں جمع کرائی گئی معلومات کے مطابق داؤد جان محمد نے 14 جولائی 2025 کو پاکستان سروسز لمیٹڈ کے 28 فیصد حصص خریدے۔ سرمایہ کار نے 700 روپے فی حصص کے حساب سے 91 لاکھ 7 ہزار 800 حصص خریدے ہیں جن کی مالیت 6 ارب 37 کروڑ روپے سے زائد ہے۔
اے کے ڈی ہولڈنگ نے 14 جولائی کو پاکستان سروسز لمیٹڈ کے 27.9 فیصد حصص خریدنے کی معلومات بھی جمع کرا دی ہیں۔ تفصیلات کے مطابق کمپنی نے پاکستان سروسز لمیٹڈ کے 90 لاکھ 89 ہزار 651 حصص 700 روپے فی حصص کے حساب سے خریدے ہیں جن کی مالیت 6 ارب 30 کروڑ روپے سے زائد ہے۔
پی ایس ایل کے ایک کروڑ 81 لاکھ 97 ہزار 550 حصص دو مختلف افراد نے 700 روپے فی حصص کے حساب سے خریدے ہیں۔ دونوں خریداریوں کی مجموعی مالیت 12 ارب روپے سے زائد ہے۔
ماہرین کے مطابق اگر دونوں مختلف خریداریوں کو ملا دیا جائے تو یہ کمپنی کے تقریبا 56 فیصد حصص بنتا ہے جو کمپنی کے بورڈ کا انتظام سنبھالنے کے لیے کافی ہے۔
ٹاپ لائن سیکیورٹیز کے چیف ایگزیکٹو محمد سہیل کا کہنا تھا کہ جی ہاں، اگر دو فریق پاکستان سروسز لمیٹڈ کے 55.95 فیصد حصص حاصل کر لیں تو وہ کمپنی کو سنبھال سکتے ہیں۔ انہوں نے مزید کہا کہ اگرچہ اس معاہدے کو معاندانہ سمجھا جاسکتا ہے ، لیکن اس بات کا بھی امکان ہے کہ یہ دونوں فریقوں کے مابین باہمی تفہیم کے ساتھ کیا گیا تھا۔
کمپنی نے پاکستان اسٹاک ایکسچینج کو 30 جون کو بورڈ اجلاس ملتوی کرنے سے آگاہ کیا تھا۔ پی ایس ایل کے ملک میں نو ہوٹل اور ایک ذیلی ادارہ ہے۔ 11 جولائی کو کاروبار کے اختتام پر پی ایس ایل کے حصص کی قیمت 782 روپے تھی اور 20 جولائی کو کاروبار کے اختتام پر یہ 10 فیصد اضافے سے 1050 روپے ہوگئی۔
