اسلام آباد وفاقی وزیر برائے نجکاری عبدالعلیم خان نے کہا ہے کہ پی آئی اے کی نجکاری کیلئے تمام اقدامات آئندہ 3 ماہ میں مکمل کر لئے جائیں گے۔
بین الاقوامی مالیاتی فنڈ (آئی ایم ایف) کی جانب سے اصلاحات پر زور دیے جانے کے ایک حصے کے طور پر، نجکاری کمیشن نے اپریل 2024 میں کہا تھا کہ وہ قومی ایئر لائن کے 51 فیصد سے 100 فیصد تک حصص کو بلاک کر رہا ہے۔
قومی اسمبلی کی قائمہ کمیٹی برائے نجکاری کو 26 فروری کو بتایا گیا تھا کہ حکومت کی پی آئی اے کی نجکاری کی پہلی ناکام کوشش سے قومی خزانے پر 4.3 ملین ڈالر کا بوجھ پڑا۔ کمیٹی کو بتایا گیا کہ نجکاری کے پہلے دور کے دوران خریداروں کی جانب سے عدم دلچسپی کی متعدد وجوہات تھیں جن میں نئے طیاروں کی خریداری پر 18 فیصد جنرل سیلز ٹیکس اور قومی ایئرلائن کے واجبات شامل ہیں۔
وزارت نجکاری کی جانب سے جاری پریس ریلیز میں وفاقی وزیر نے کہا کہ پی آئی اے کی نجکاری کو مزید پرکشش بنانے کے لیے نیا روڈ میپ فراہم کیا جا رہا ہے، توقع ہے کہ نجکاری کے اس عمل کے تمام مراحل اگلے تین ماہ میں مکمل کر لیے جائیں گے۔
انہوں نے کہا کہ پی آئی اے کی نجکاری کے عمل میں دلچسپی رکھنے والی جماعتوں کے تمام خدشات کو مناسب طریقے سے حل کیا گیا ہے۔ نتیجتا حکومت نے پی آئی اے کی نجکاری کے لیے دلچسپی رکھنے والے فریقین کی ترجیحات کے مطابق تبدیلیاں کرنے کا فیصلہ کیا ہے۔
انہوں نے کہا کہ اس میں کوئی شک نہیں کہ پی آئی اے منافع بخش بننے کی صلاحیت رکھتی ہے اور امید ہے کہ نجکاری کا عمل مزید قابل عمل ہوگا جس سے مجموعی عمل پر مثبت اثرات مرتب ہوں گے۔
انہوں نے کہا کہ اس بار سرمایہ کاروں کی جانب سے بہتر اظہار دلچسپی کی توقع ہے کیونکہ پی آئی اے کی یورپ کے لیے پروازوں کے آغاز نے نجکاری کے ماحول کو مزید منافع بخش اور سازگار بنا دیا ہے۔
حالیہ اقدامات کی وجہ سے قومی ایئرلائن دوبارہ منافع بخش بننے کے لیے تیار ہے۔
وفاقی وزیر نے کہا کہ یورپ کے بعد اگلے تین ماہ میں برطانیہ کے لیے پروازیں شروع ہو جائیں گی۔
انہوں نے کہا کہ یورپ اور برطانیہ کے بعد اگلے مرحلے میں امریکا اور مشرق بعید کے لیے پروازیں فعال ہوں گی، پی آئی اے پاکستانیوں کے لیے سفر کے لیے پہلی ترجیح ہے۔
انہوں نے کہا کہ پی آئی اے کی ساکھ بحال کی جائے گی اور مثبت اقدامات کے ساتھ ایئرلائن کو اپنے عروج پر واپس لایا جائے گا۔
انہوں نے کہا کہ اس میں کوئی شک نہیں کہ پی آئی اے اب بھی ایک بار پھر منافع بخش بننے کی صلاحیت رکھتی ہے۔
