کمشنر راولپنڈی لیاقت چٹھہ کے الزامات پر چیف جسٹس آف پاکستان قاضی فائز عیسیٰ کا ردعمل آگیا۔
چیف جسٹس قاضی فائز عیسیٰ کا کہنا ہے کہ بے بنیاد الزامات لگائے گئے اس میں نہ صداقت ہے نہ ہی سچائی ہے۔
چیف جسٹس نے کہا کہ الزام لگانے والے نے نہ کوئی ثبوت پیش کیا، کل کو مجھ پر چوری، قتل کا الزام لگادیں گے۔
جسٹس قاضی فائز عیسیٰ نے کہا کہ الزامات لگانا آپ کا حق ہے مگر ساتھ ثبوت بھی دیں۔
دوسری جانب سپریم کورٹ بار ایسوسی ایشن نے کمشنر راولپنڈی کے الزامات پر شدید تحفظات کا اظہار کیا ہے۔
سپریم کورٹ بار کا اعلامیے میں کہنا ہے کہ چیف جسٹس کے ملوث ہونے کے الزام پر شدید تحفظات ہیں، کمشنر کا بیان بدنیتی پر مبنی اور چیف جسٹس کے عہدے کو بے توقیر کرنے کی کوشش ہے۔
اعلامیے میں کہا گیا ہے کہ چیف جسٹس یا سپریم کورٹ کا انتخابات میں دھاندلی سے متعلق کوئی کردار نہیں ہے، انتخابی عمل الیکشن کمیشن کا انتظامی معاملہ ہے۔
سپریم کورٹ بار کا کہنا ہے کہ الیکشن کمیشن کمشنر راولپنڈی کے دھاندلی سے متعلق الزامات کی انکوائری کرے۔
