پی ٹی آئی کی جانب سے وزارت اعلیٰ کے لیے نامزد اسلم اقبال سمیت تمام اراکین نے پنجاب اسمبلی کے اجلاس میں شرکت کرنے کا فیصلہ کرلیا۔
تفصیلات کے مطابق پاکستان تحریک انصاف کے سینئر قائدین کا اہم اجلاس ہوا، جس میں پی ٹی آئی کی جانب سے وزارت اعلیٰ کے لیے نامزد اسلم اقبال سمیت تمام اراکین نے پنجاب اسمبلی کے اجلاس میں شرکت کرنے کا فیصلہ کرلیا۔
اجلاس میں الیکشن میں ہارنے والے امیدواروں کو پنجاب اسمبلی کے باہر احتجاج کی ہدایت کی گئی اور کہا گیا کہ اسلم اقبال کو وزارت اعلیٰ انتخاب سے باہر رکھنےکی کوشش کی جارہی ہے اور انھیں باہررکھنےکیلئےبیہودہ ہتھکنڈےاستعمال کئے جارہے ہیں۔
سینئر قیادت کا کہنا تھا کہ مریم نواز کیلئے ریاستی مشینری سےمیدان خالی کرانےکی کوششیں جاری ہیں، مریم نوازکی ایما پر پنجاب پولیس کے ذریعے اسلم اقبال کواغواکی کوشش کی گئی۔
پی ٹی آئی کی قیادت نے کہا کہ منتخب اراکین وزارت اعلیٰ امیدواراسلم اقبال کےہمراہ اسمبلی پہنچیں گے، پی ٹی آئی کے منتخب ارکان مینڈیٹ چوروں کا مقابلہ کریں گے، ملک کو بنانا ری پبلک ،پنجاب کو قزاقوں کا راجواڑہ بنانے کی اجازت نہیں دیں گے، مینڈیٹ چوروں کا تماشہ بند ہونا چاہیے، مینڈیٹ منتخب نمائندوں کولوٹاکرآئین کی بالادستی کی راہ ہموارکی جائے۔
خیال رہے پنجاب اسمبلی کا افتتاحی اجلاس آج صبح دس بجے ہوگا، جس میں نومنتخب ارکان اسمبلی حلف اٹھائیں گے، جس کے بعد اسپیکر اور ڈپٹی اسپیکرکے انتخاب کا شیڈول جاری کیا جائے گا۔
