محکمہ وائلڈلائف نے کہا ہے کہ منتقلی کے دوران بھاگنے والی مادہ رائل بنگال ٹائیگر کو ریسکیو کرلیا گیا ہے۔
تفصیلات کے مطابق محکمہ وائلڈ لائف نے بتایا کہ رات گئے مادہ رائل بنگال ٹائیگر تھانہ الپہ کی حدود سے پنجرہ توڑ کرنکل گئی تھی۔ گاڑی میں مادہ بنگال ٹائیگر کو غیرقانونی طور پر منتقل کیا جا رہا تھا۔
محکمہ وائلڈ لائف ملتان کی ٹیم نے مادہ ٹائیگر کو تھانہ الپہ کی حدود سے ریسکیو کیا جبکہ اسے ٹرینکولائزر گن کے ذریعے بےہوش کر کے ریسکیو کیا گیا۔
وائلڈ لائف کا کہنا تھا کہ آپریشن کے دوران عملے کا ایک رکن اور مالک زخمی ہوا جنھیں اسپتال منتقل کردیا گیا ہے۔ رائل بنگال ٹائیگر کو عارضی طور پر ڈی ایچ اے زو میں رکھا گیا ہے۔
مادہ ٹائیگر کی عمر ڈیڑھ سے 2 سال جبکہ مالیت 50 سے 60 لاکھ روپے ہے۔ ڈپٹی ڈائریکٹر وائلڈ لائف نے بتایا کہ رائل بنگال ٹائیگر کے مالک نے لائسنس پیش کردیا ہے۔
ڈپٹی ڈائریکٹر وائلڈ لائف نے مزید کہا کہ قانون کے مطابق مادہ چیتے کا مالک محکمانہ معاوضہ ادا کرے گا۔ معاوضے کی ادائیگی کے بعد مادہ ٹائیگر اسکے مالک کو واپس کردی جائے گی۔
