دمشق میں ایران کے سفارتی مرکز پر غاصب صیہونی حکومت کی جارحیت کے بعد منھ توڑ جواب کے طور پر مقبوضہ فلسطین میں صیہونی فوجی ٹھکانوں پر ڈرون حملے شروع ہو گئے ہیں۔
ان حملوں سے غاصب صیہونی حکومت حواس باختہ ہو گئی ہے اور پورے مقبوضہ فلسطین میں ہلچل مچ گئی ہے اور افرا تفری کا ماحول ہے۔ غاصب صیہونیوں پر خوف و ہراس طاری ہے اور صیہونی حکام کی نیندیں اڑ گئی ہیں۔
غاصب صیہونی حکومت کے ٹی وی چینل 12 نے ان حملوں کی تصدیق کی ہے۔
امریکی حکام نے بھی اسرائیل پر ایران کے حملے کی تصدیق کردی ہے۔
وائٹ ہاؤس نے اپنے بیان میں کہا ہے کہ ایران نے اسرائیل پر فضائی حملے شروع کردیے ہیں۔
عرب میڈیا کا کہنا ہے کہ ایران نے اسرائیل پر درجنوں ڈرون فائر کیے ہیں۔
ایرانی میڈیا کے مطابق ایران نے اسرائیل پر وسیع پیمانے پر ڈرون حملے کیے ہیں۔
اس حوالے سے اسرائیلی ٹی وی نے دعویٰ کیا ہے کہ ایران نے کروز میزائل بھی فائر کر دیے ہیں۔
ایران کی جانب سے اسرائیل پر ڈرون فائر کرنے پر اسرائیلی وزیراعظم نے اپنے ردعمل میں کہا ہے کہ اسرائیل ہر صورتحال کے لیے تیار ہے۔
ادھر ایران کے پاسداران انقلاب نے ایک بیان میں کہا ہے کہ اس نے درجنوں ڈرون اور میزائل لانچ کرکے اسرائیل کے مخصوص مقامات کو نشانہ بنایا ہے۔
