بیان کے مطابق شائقین کو داخلے کے لیے اپنا اصل شناختی کارڈ یا بی فارم ساتھ لانا ہوگا
پاکستان کرکٹ بورڈ (پی سی بی) نے راولپنڈی کرکٹ اسٹیڈیم میں پاکستان اور بنگلہ دیش کے درمیان پہلے ٹیسٹ میچ کے باقی دنوں کے لیے شائقین کے لیے مفت داخلے کا اعلان کیا ہے۔
یہ فیصلہ زیادہ سے زیادہ خاندانوں اور طلباء کو میچ دیکھنے کی ترغیب دینے کے لیے کیا گیا ہے، اور یہ ٹیسٹ کے چوتھے اور پانچویں دنوں پر لاگو ہوگا۔ جاری سیریز آئی سی سی ورلڈ ٹیسٹ چیمپئن شپ 2023-25 کا حصہ ہے۔
پی سی بی کے بیان کے مطابق، شائقین کو داخلے کے لیے اپنا اصل شناختی کارڈ یا بی فارم ساتھ لانا ہوگا۔ وی آئی پی انکلوژرز (عمران خان اور جاوید میانداد) اور پریمیم انکلوژرز (میران بخش، شعیب اختر، سہیل تنویر، اور یاسر عرفات) میں مفت رسائی دی جائے گی، جبکہ وی آئی پی سیکشنز میں صرف خاندانوں کے لیے نشستیں مخصوص ہوں گی۔
مفت داخلہ پالیسی پی سی بی گیلری اور پلاٹینم باکس کے ٹکٹوں پر لاگو نہیں ہوگی۔ ان دنوں کے لیے پہلے سے ٹکٹ خریدنے والے شائقین کو رقوم کی واپسی کی جائے گی۔ آن لائن خریداری کرنے والوں کو خود بخود رقم واپس کر دی جائے گی، جبکہ ایکسپریس سینٹرز سے خریداری کرنے والوں کو اپنی اصل ٹکٹیں واپس کرنی ہوں گی تاکہ وہ رقم کی واپسی حاصل کر سکیں، بیان میں مزید کہا گیا۔
اس کے علاوہ، پی سی بی نے میچ کے دنوں میں شائقین کے لیے دو راستوں پر اسٹیڈیم تک آسان رسائی کے لیے ایک مفت شٹل سروس کا انتظام بھی کیا ہے۔