اسٹیٹ بینک آف پاکستان کا کہنا ہے کہ دسمبر میں بیرون ملک مقیم پاکستانیوں کی جانب سے ترسیلات زر میں 3.1 ارب ڈالر کا اضافہ ریکارڈ کیا گیا جسے وزیراعظم شہباز شریف نے ریکارڈ اضافہ قرار دیا۔
آج جاری ہونے والے ایک بیان میں کہا گیا ہے کہ کارکنوں کی ترسیلات زر میں گزشتہ سال کے اسی مہینے کے مقابلے میں 29.3 فیصد اضافہ ہوا اور نومبر 2024 کے مقابلے میں 5.6 فیصد اضافہ ہوا۔
اسٹیٹ بینک کے مطابق مالی سال 2024-25 کی پہلی ششماہی کے دوران ترسیلات زر میں مجموعی طور پر 32.8 فیصد اضافہ ہوا، جولائی تا دسمبر 2024 کے دوران ترسیلات زر 17 ارب 80 کروڑ ڈالر رہیں جبکہ گزشتہ مالی سال کے اسی عرصے میں ترسیلات زر 13 ارب 40 کروڑ ڈالر تھیں۔
ترسیلات زر کی ایک علیحدہ تفصیلی رپورٹ میں کہا گیا ہے کہ نومبر کے دوران 2.91 ارب ڈالر اور دسمبر 2023 میں 2.38 ارب ڈالر کی ترسیلات زر ریکارڈ کی گئیں۔
اسٹیٹ بینک کے مطابق دسمبر میں ترسیلات زر بنیادی طور پر سعودی عرب (770.6 ملین ڈالر)، متحدہ عرب امارات (631.5 ملین ڈالر)، برطانیہ (456.9 ملین ڈالر) اور امریکہ (284.3 ملین ڈالر) سے موصول ہوئیں۔
رپورٹ کے مطابق دسمبر کے دوران دیگر خلیجی ممالک سے ترسیلات زر 31 کروڑ ڈالر، یورپی یونین سے 36 کروڑ 30 لاکھ ڈالر، آسٹریلیا سے 6 کروڑ 88 لاکھ ڈالر، ملائیشیا سے ایک کروڑ 58 لاکھ ڈالر اور ناروے سے 96 لاکھ ڈالر موصول ہوئیں۔
وزیراعظم شہباز شریف نے ریکارڈ اضافے پر قوم کو مبارکباد دیتے ہوئے کہا کہ ملکی معیشت کو روکنے کا نعرہ لگانے والوں کے دعوے بے بنیاد ثابت ہوئے ہیں۔
وزیر اعظم نے کہا کہ غیر ملکی ترسیلات زر میں ریکارڈ اضافہ بیرون ملک مقیم پاکستانیوں کے ملک کی ترقی میں اپنا کردار ادا کرنے کے پختہ عزم کی عکاسی کرتا ہے۔
انہوں نے مزید کہا کہ معاشی استحکام کے حصول کے بعد اب ملک معاشی ترقی کی راہ پر گامزن ہے اور حکومت قومی ترقی اور عوامی فلاح و بہبود کو یقینی بنانے کے لئے پرعزم ہے۔
گورنر اسٹیٹ بینک جمیل احمد نے ایک روز قبل امید ظاہر کی تھی کہ ترسیلات زر میں اضافے اور افراط زر میں کمی سے رواں سال معیشت کو استحکام ملے گا۔
انہوں نے تخمینہ لگایا کہ مالی سال 25 میں خطے میں ترسیلات زر 35 ارب ڈالر ہوں گی۔
