خیبر پختونخوا کے وزیر اعلیٰ کے دفتر سے جاری ہونے والے ایک بیان کے مطابق ہفتے کے روز خیبر پختونخوا کے ضلع شمالی وزیرستان میں ہونے والے ایک خودکش دھماکے میں کم از کم آٹھ سیکیورٹی اہلکار شہید ہو گئے۔
بیان کے مطابق وزیر اعلیٰ خیبر پختونخوا علی امین گنڈاپور نے شمالی وزیرستان کے علاقے میر علی میں ہونے والے حملے کی مذمت کی اور جوانوں کی شہادت پر تعزیت اور دعا کی۔
گنڈاپور نے کہا کہ میں سیکورٹی اہلکاروں اور ان کے اہل خانہ کو سلام پیش کرتا ہوں جنہوں نے ملک اور قوم کے لئے اپنی جانوں کا نذرانہ پیش کیا ہے۔
انہوں نے کہا کہ سیکیورٹی فورسز نے ملک میں امن کے قیام اور دہشت گردی کے خاتمے کے لیے بے مثال قربانیاں دی ہیں۔ انہوں نے کہا کہ یہ قربانیاں دہشت گردی کے خلاف قوم کے عزم اور حوصلے کو مزید بلند کرتی ہیں۔
بیان میں کہا گیا ہے کہ دہشت گردی کے خلاف جنگ میں ملک کا ہر فرد سیکیورٹی فورسز کے ساتھ کھڑا ہے۔
قبل ازیں ڈسٹرکٹ پولیس آفیسر (ڈی پی او) وقار احمد نے Dawn.com کو بتایا تھا کہ گاڑی میں نصب دیسی ساختہ دھماکہ خیز مواد سے کیے گئے خودکش حملے میں چار شہری زخمی ہوئے ہیں۔
خیال رہے کہ چند روز قبل کے پی کے جنوبی وزیرستان میں انٹیلی جنس بیسڈ آپریشن (آئی بی او) کے دوران دو جوان شہید اور 11 دہشت گرد مارے گئے تھے۔
ابھی تک کسی نے اس کی ذمہ داری قبول نہیں کی ہے۔
واضح رہے کہ 15 جون کو ضلع اپر جنوبی وزیرستان کی تحصیل لدھا میں فائرنگ کے تبادلے میں فرنٹیئر کور (ایف سی) کا ایک جوان شہید ہوا تھا۔
رواں ماہ کے اوائل میں شمالی وزیرستان کے علاقے دتہ خیل میں سیکیورٹی آپریشن کے دوران 14 دہشت گرد مارے گئے تھے۔
پاکستان انسٹی ٹیوٹ فار کنفلکٹ اینڈ سیکیورٹی اسٹڈیز کے جاری کردہ اعداد و شمار کے مطابق عسکریت پسند گروپ گزشتہ ماہ ملک میں اپنی سرگرمیوں میں خاطر خواہ اضافہ کرنے میں ناکام رہے، جس میں اپریل میں 81 کے مقابلے میں مئی میں 85 حملے ریکارڈ کیے گئے تھے۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ بھارت پاکستان میں دہشت گرد حملوں میں تیزی لانے کے لیے اپنے اثاثے استعمال کر رہا ہے۔
نومبر 2022 میں تحریک طالبان پاکستان کی جانب سے حکومت کے ساتھ جنگ بندی ختم کرنے کے بعد پاکستان میں خاص طور پر کے پی اور بلوچستان میں دہشت گردی کی سرگرمیوں میں اضافہ دیکھا گیا ہے۔
پاکستان گلوبل ٹیررازم انڈیکس 2025 میں دوسرے نمبر پر ہے جہاں گزشتہ سال کے دوران دہشت گرد حملوں میں ہلاکتوں کی تعداد 45 فیصد اضافے کے ساتھ 1081 ہوگئی ہے۔
