آئی سی جے اس ہفتے اسرائیل کے خلاف فلسطینیوں کی نسل کشی کیس میں حکم جاری کرے گا۔
عدالت نے ایک بیان میں کہا کہ بین الاقوامی عدالت انصاف اس جمعہ 26 جنوری کو اسرائیل کے خلاف عارضی اقدامات کے لیے جنوبی افریقا کی درخواست پر حکم جاری کرے گی۔
یہ نوٹ کرنا ضروری ہے کہ یہ کیس کا حتمی فیصلہ نہیں ہوگا بلکہ صرف جنوبی افریقا کی جانب سے درخواست کردہ عارضی اقدامات پر حکم ہوگا۔
آئی سی جے بیان کے مطابق یہ حکم نسل کشی کنونشن کے تحت فلسطینی عوام کے حقوق کو مزید، شدید اور ناقابل تلافی نقصان سے بچانے، اسرائیل کی نسل کشی کے کنونشن کے تحت اپنی ذمہ داریوں کی تعمیل کو یقینی بنانے، نسل کشی میں ملوث نہ ہونے اور نسل کشی کو روکنے اور سزا دینے کے حوالے سے ہوگا۔
جنوبی افریقا نے بین الاقوامی عدالت انصاف میں ہنگامی کیس شروع کیا ہے جس میں گزشتہ ہفتے یہ دلیل دی گئی تھی کہ اسرائیل اقوام متحدہ کے 1948 میں ہونے والے نسل کشی کنونشن کی خلاف ورزی کر رہا ہے۔
عالمی عدالت انصاف (آئی سی جے) میں فلسطینیوں کی صہیونی فورسز کے ہاتھوں نسل کشی کے خلاف درخواست پر سماعت ہوئی، جنوبی افریقہ کے وکلا نے اسرائیلی جارحیت کو بے نقاب کیا، اسرائیلی فورسز کی غزہ میں بمباری کی ویڈیوز دیکھ کر اسرائیلی وکلا کی ٹیم حیران ہو گئی۔
جنوبی افریقی وکیل نے کہا اسرائیلی فوجی غزہ میں اپنے وزیر اعظم کی سوچ پر عمل کر رہے ہیں، اس عدالت کے حکم کے سوا کوئی چیز غزہ کے لوگوں کی تکلیف کو نہیں روک سکتی، اس عدالت کے پاس اسرائیل کی غزہ میں نسل کشی کے 13 ہفتوں کے ثبوت موجود ہیں، غزہ میں نہ بجلی ہے، نہ پانی، نہ صحت کی سہولیات ہیں، اسرائیل نے غزہ والوں سے سب چھین لیا ہے۔
وکیل نے کہا اسرائیلی وزیر اعظم نے غزہ میں جنگ کا اعلان کیا اور غزہ کو لوگوں کے لیے جہنم بنا دیا، غزہ میں لوگوں کے لیے ہر جگہ موت ہے، غزہ والے یا تو بھوک اور پیاس یا بمباری کا نشانہ بن رہے ہیں۔
واضح رہے کہ عدالت میں سماعت شروع ہوئی تو فلسطینی وزارت خارجہ کی ٹیم بھی وہاں موجود تھی، عالمی عدالت انصاف کے جج نے جنوبی افریقہ کی درخواست پڑھ کر سنائی، بعد ازاں وکیل جنوبی افریقہ نے کہا اسرائیل نے 96 روز سے غزہ کو بدترین بمباری کا نشانہ بنایا ہوا ہے، اور غزہ میں نسل کشی کے کنوشن کی خلاف ورزی کر رہا ہے، یہ عالم ہے کہ غزہ میں کوئی جگہ محفوظ نہیں ہے۔
