امریکا میں غزہ جنگ سوشل میڈیا پر لڑی جانے لگی ہے، ہر چار میں ایک مسلمان یا یہودی سوشل میڈیا صارف نے کسی نہ کسی کو انفرینڈ یا بلاک کر رکھا ہے۔
پیو ریسرچ سینٹر کی جانب کیے گئے سروے کے مطابق غزہ جنگ کے بعد ہر چار مسلمان یا یہودی امریکیوں میں سے ایک نے سوشل میڈیا پر کسی فالوور یا صارف کو انفرینڈ یا بلاک کر دیا ہے۔
سروے میں ہر چار یہودیوں میں سے تین اور ہر پانچ مسلمانوں میں سے تین نے بتایا کہ غزہ جنگ کے حوالے سے سوشل میڈیا پر موجود مواد سے ان کے جذبات مجروح ہوئے۔ جن صارفین کے جذبات مجروح ہوئے، ان میں 65 سال سے زائد عمر کے افراد نے پوسٹس رپورٹ کیں، جب کہ 30 سال سے کم عمر کے افراد نے تکلیف دہ مواد پر صارفین کو انفرینڈ یا بلاک کر دیا۔
بعض امریکیوں نے بتایا کہ غزہ جنگ کے حوالے سے ناپسندیدہ تبصرہ کرنے پر انھوں نے اپنے دوستوں اور جاننے والوں سے بات چیت ہی ختم کر دی۔ یہ سروے فروری میں کیا گیا، اور اس میں 12 ہزار 700 بالغ امریکی شہریوں سے سوالات کیے گئے، اکثر شہریوں نے بتایا کہ انھوں نے غزہ جنگ کے حوالے سے میڈیا کوریج کو قریب سے دیکھا، اور بتایا کہ مسلمانوں، عربوں اور یہودیوں کے حوالے سے انھوں نے امتیازی سلوک میں اضافہ ہوتے دیکھا۔
