وزیراعظم کا آئی ٹی برآمدات میں 25 ارب ڈالر کا ہدف حاصل کرنے کے عزم کا اظہار
وزیراعظم شہباز شریف نے کہا ہے کہ ملک میں فائیو جی انٹرنیٹ متعارف کرانے کے لیے اقدامات کیے جا رہے ہیں۔
اسلام آباد میں ٹیلی کمیونیکیشن اور ڈیجیٹل سروسز کمپنی ویون گروپ کے وفد سے گفتگو کرتے ہوئے وزیراعظم شہباز شریف نے کہا کہ اس سے ڈیجیٹل پاکستان کے وژن کے حصول میں بھی مدد ملے گی۔
پاکستان کئی مہینوں سے سست انٹرنیٹ کا شکار ہے جس کے دوران سوشل میڈیا سائٹس پر بھی کئی بار بندش دیکھی گئی جس سے عوام کو مایوسی ہوئی۔
ملک کی انٹرنیٹ کی رفتار بین الاقوامی معیار سے بری طرح پیچھے ہے، جس سے ملک کو عالمی ڈیجیٹل معیشت کی دھول میں چھوڑنے کا خطرہ ہے۔
فروری کے بعد سے ایکس تک رسائی محدود ہے اور صارفین اکثر فیس بک، انسٹاگرام، واٹس ایپ اور اسنیپ چیٹ جیسے سوشل میڈیا پلیٹ فارمز کی خدمات میں خلل کی شکایت کرتے ہیں۔
گزشتہ ہفتے پاکستان ٹیلی کمیونیکیشن اتھارٹی (پی ٹی اے) نے دعویٰ کیا تھا کہ ایس ایم ڈبلیو 4 زیر آب کیبل خرابی کی کامیاب مرمت کے بعد ملک بھر میں انٹرنیٹ خدمات بحال کردی گئی ہیں۔
دی نیوز کے مطابق، پی ٹی اے نے کہا تھا کہ پانی کے اندر دو کیبلز – ایس ایم ڈبلیو 4 (جون میں) اور اے اے ای 1 (اگست میں) میں نقائص کی وجہ سے تقریبا 4 ماہ کی بندش کے بعد انٹرنیٹ خدمات بحال کردی گئی ہیں۔
دریں اثنا وزیراعظم نے آئندہ تین سالوں میں آئی ٹی برآمدات میں 25 ارب ڈالر کے ہدف کے حصول کے لئے حکومت کے عزم کا اظہار کیا۔
انہوں نے کہا کہ حکومت ٹیلی کمیونیکیشن کے شعبے کی ترقی اور فروغ کے لئے کام کر رہی ہے۔
وزیراعظم نے کیش لیس اور ڈیجیٹل اکانومی کے فروغ میں ٹیلی کام سیکٹر کے کردار کو انتہائی اہم قرار دیتے ہوئے انفارمیشن ٹیکنالوجی، ڈیجیٹلائزیشن اور مصنوعی ذہانت کے فروغ کے لیے ویون گروپ کے ساتھ مل کر کام کرنے پر آمادگی کا اظہار کیا۔
وفد نے ملک میں معاشی استحکام کے حوالے سے حکومتی کاوشوں کو سراہا۔ اس نے تسلیم کیا کہ پاکستان آئی ٹی اور ٹیلی کام کے شعبے میں سرمایہ کاری کے لئے ایک اہم ملک بن گیا ہے۔
