پاکستان انٹرنیشنل ایئرلائنز (پی آئی اے) کا کہنا ہے کہ یورپی یونین کے ایوی ایشن ریگولیٹر کی جانب سے پی آئی اے پر عائد پابندی ختم کیے جانے کے بعد وہ جلد ہی یورپی روٹس کو دوبارہ شروع کرنے کی توقع رکھتے ہیں اور برطانیہ کے متعدد مقامات پر نظریں جمائے ہوئے ہیں۔
یورپی یونین ایوی ایشن سیفٹی ایجنسی (ای اے ایس اے) نے پاکستانی حکام اور سول ایوی ایشن اتھارٹی (پی سی اے اے) کی بین الاقوامی ایوی ایشن معیارات کی تعمیل کو یقینی بنانے کی اہلیت کے بارے میں خدشات پر جون 2020 میں پی آئی اے کا یورپی یونین میں کام کرنے کا اجازت نامہ معطل کردیا تھا۔
پی آئی اے کے ترجمان عبداللہ حفیظ خان نے خبر رساں ادارے روئٹرز کو بتایا کہ پی آئی اے برطانیہ کے روٹ کی بحالی کے لیے برطانیہ کے محکمہ ٹرانسپورٹ (ڈی ایف ٹی) سے رابطہ کرنے کا ارادہ رکھتی ہے کیونکہ ای اے ایس اے کی کلیئرنس ان کے فیصلے کے لیے لازمی شرط ہے۔
ای اے ایس اے اور برطانیہ کے حکام نے پی آئی اے کو خطے میں کام کرنے کی اجازت اس وقت معطل کردی تھی جب پاکستان نے طیارہ حادثے میں 97 افراد کی ہلاکت کے بعد پائلٹس کے لائسنس کی قانونی حیثیت کی تحقیقات شروع کی تھیں۔
خان نے کہا کہ ایئرلائن کو توقع ہے کہ اگلے تین سے چار ہفتوں میں پیرس سے یورپ کے لئے پروازیں دوبارہ شروع ہوجائیں گی۔
خان نے کہا کہ پی آئی اے کو برطانیہ کی پروازوں کی اجازت ملنے کے بعد لندن، مانچسٹر اور برمنگھم سب سے زیادہ طلب والے مقامات ہوں گے۔
پی آئی اے اور حکومت، جو پی آئی اے میں 60 فیصد حصص فروخت کرنے کا ارادہ رکھتی ہے، نے ای اے ایس اے پر زور دیا تھا کہ وہ عارضی طور پر بھی پابندی ختم کرے۔ اس پابندی کی وجہ سے ایئر لائن کو سالانہ 40 ارب روپے (144 ملین ڈالر) کا نقصان اٹھانا پڑا۔
خان نے کہا کہ کمپنی کے پاس نئے راستوں کو شامل کرنے کے لئے کافی نقد بہاؤ ہے۔ انہوں نے کہا کہ حکومت کی جانب سے نجکاری پر بات چیت کو حتمی شکل دینے کے بعد نئے طیاروں کو لیز پر دینے کا فیصلہ کیا جائے گا۔
خسارے میں چلنے والی قومی ایئرلائن کا پاکستان کی مقامی ایوی ایشن مارکیٹ میں 23 فیصد حصص ہے لیکن اس کے 34 طیاروں پر مشتمل بیڑا مشرق وسطیٰ کی فضائی کمپنیوں کا مقابلہ نہیں کر سکتا جو 87 ممالک کے ساتھ معاہدوں اور اہم لینڈنگ سلاٹس کے باوجود براہ راست پروازوں کی کمی کی وجہ سے 60 فیصد مارکیٹ شیئر رکھتی ہیں۔
ایئر لائن کی نجکاری کی حکومت کی کوشش اس وقت ناکام ہو گئی جب اسے صرف ایک ہی پیشکش موصول ہوئی، جو اس کی مانگی گئی قیمت سے کافی کم تھی۔
اب یورپ اور آئندہ برطانیہ کے روٹس کے ساتھ ہمیں توقع ہے کہ آمدنی میں اضافہ ہوگا اور اس طرح نجکاری کے عمل کے دوران پی آئی اے کی قدر میں اضافہ ہوگا۔
